tg-me.com/Nargiza_Asad/2275
Last Update:
Йўл очерки
ШОИР УМРИГА ЧИН ТАЪРИФ, ШЕЪР ТИНГЛАГАН ЮРТДОШЛАР ВА КАПАЛАК ҲАҚИДА
Сирдарёга яқинмиз. Тошкент вилояти билан бизни дарёлар, узун кўприклар, оқ лайлаклар ин солган симёғочлар ажратиб туради, холос. Боғлаб турадиган ришталар эса талай. Бу юрт билан ҳамманинг ўз илиқ таассуротлари бор. Аммо меҳру муҳаббатимизни бирлаштирадиган шундай инсонлар борки, улар шу тупроқни барчамиз учун бирдек азиз этади. Ҳалима Худойбердиева ана шундай улкан қалб ва истеъдод соҳибидир. У нафақат сирдарёликларни, балки бутун бир халқни адабиёт отлиғ бир нуқтада бирлаштиради.
Саҳарлаб етиб келганимиз Гулистон шаҳрида бугун қўш байрамга тадорик авжида экан. “Зомин қалдирғочлари” семинарининг Тошкент ва Сирдарё вилоятлари босқичини ўтказиш учун Ўзбекистон Ёзувчилар уюшмаси раиси ўринбосари Ботиржон Эргашев бошчилигида, ёзувчи Абдуқаюм Йўлдошев, шоира Гулжамол Асқарова, уюшманинг жонкуяр ходимлари Фозил Фарҳод, Алишер Боймуродов билан бирга саралаш боқичида иштирок этдик. Тадбирни кириш қисмида Ўзбекистон халқ шоири, Ёзувчилар уюшмасининг Тошкент вилояти бўлими раҳбари Махмуд Тоир, вилоят ҳокими маслаҳатчиси Муроджон Ҳайитов, Ёзувчилар уюшмасининг Сирдарё вилояти бўлими раҳбари Ҳаётхон Ортиқбоева ва шоира Баҳор Холбекова сўзга чиқиб, семинар иштирокчиларини қутлади.
Семинар иши назм, наср, болалар адабиёти, публицистика ва драматургия жанрлари бўйича шўъбаларга бўлинган ҳолда давом этди. Ёш қаламкашларнинг ижодий ишлари устозлар томонидан кўрилди, тингланди. Суҳбат давомида ёшларда адабиётга бўлган ҳурмат баландлиги, ўзига хосликка интилаётгани, шу билан бирга, уларда ўқишга бўлган муносабат ҳали тўлиқ шаклланмаган жиҳатлар ҳам, афсуски, кўзга ташланди. Эътиборлиси, ёшлар устозлар берган тавсияларни, холис муносабатларни қалби билан тинглади, тўғри хулоса чиқарди. Улар орасида тенгдошларига қараганда шеъри анча баланд, насрида тош босар тасвирлар топишга уринган ёшлар борлиги бизни қувонтирди. Шаҳарнинг марказида ҳазрат Навоий ҳайкали ёнида жойлашган очиқ айвонда кечган мушоирамиз кундалик юмуши билан банд бўлган кишиларни-да бефарқ қолдирмади. Ишга шошиб кетаётганлар, супургисини қўйиб шеър сеҳрига чўмган фаррош опалар, елкаларида юлдузлари порлаб турган тинчлик посбонлари... Дунёда шеър отлиғ мўъжизанинг борилигини эслаган бу юртдошларнинг шеър тинглашини томоша қилишининг ўзи завқли, ҳузурли эди...
Тадбирнинг иккинчи қисми Ўзбекистон халқ шоири Ҳалима Худойбердиева таваллудининг 74 йиллиги бағишланган тантанага уланди. Шоир номи билан аталувчи Ижод мактабида бўлиб ўтган тадбирда ҳукумат вакиллари, шоирнинг дўстлари, шогирдлари, оила аъзолари иштирок этди. Сирдарё вилояти ҳокими Ғофур Мирзаевнинг кириш сўзидан сўнг, Ёзувчилар уюшмаси раисининг биринчи ўринбосари Нодир Жонузоқ, Ўзбекистон халқ артисти Дилором Каримова ва бошқалар сўзга чиқиб, Ҳалима опанинг шонли умр йўли, бетакрор ижоди ҳақида тўхталди. Ёзувчилар уюшмаси аъзоси Эшқобил Шукурнинг “Ҳалима опа шоир бўлиб келди, шоир бўлиб яшади, шоир бўлиб ўтди”, деган сўзлари довюрак, матонат эагасининг бутун умрига берилган чин таъриф эди, назаримда.
Тадбир ёрқин хотираларга бой бўлди. Қайтар чоғимиз ҳамма қатори шоирга эҳтиром рамзи бўлмиш ҳайкал пойида суратга тушдик. Қизиқ, шу тобда опанинг ушбу сатри ёдимга тушди:
“Онагинам!
Дориламон кунлар кулди, шафақлари ол,
Қаён боқсанг, шайланишлар ва созлашлар тор.
Олча гулин кўзларингга суртасан беҳол:
«Бу кунларга етганлар бор, етмаганлар бор".
Шу кунларга етганлар, яъни биз шоирнинг пойида турардик. Хаёлимни билгандек дўстим Фозилбек: “Барибир шоирлик буюклик экан-да, бугун не-не кишилар унинг пойида” деди, жилмайиб қўйдим. Пойтхатга қайтарканмиз, шоирнинг жон шогирди Гулжамол опа: “Наргиз қара капалак, Ҳалима опамники бўлса керак, раҳмат айтаяпти чоғи. Уч, энди озодсан”, деди ойнани очиб. Капалак учиб кетди, биз эса жим қолдик...
Наргиза Асадова,
Ўзбекистон Ёзувчилар уюшмаси аъзоси
Сайт I Телеграм I Фейсбук
BY NARGIZA ASAD
Share with your friend now:
tg-me.com/Nargiza_Asad/2275